Leerders van Delmas en omgewing se skole het in groot getalle en volhardend aan ’n kultuurfees deelgeneem. Deelnemende skole was Laerskool Delmas, Laerskool Eloff, Laerskool Sundra, Nesher Privaat Skool, die Eldamah Academy, sowel as Hoërskool Delmas.

Die groot gala-aand is op 15 Augustus by die gasheerskool, Laerskool Eloff, aangebied. Die voorafgaande week is gekenmerk deur sang, dans, skeppende kuns en musiek, en kultuur het behoorlik geseëvier.

“Dit was ’n heerlike kultuurfees met opgewonde gesiggies wat hulself met hulle wonderlike talente uitgeleef het,” het Maria Schutte, onderwyser van Laerskool Eloff, gesê.

“Baie dankie aan al die skole se personeel, leerders en ouers wat hierdie geskiedkundige gebeurtenis ’n werklikheid gemaak het.”