Die Teksa Blommeklub het op 10 September al die pad van Secunda gery om hul maandvergadering by Roz du Preez op Standerton te hou.

Vandeesmaand se kompetisie-artikel was ’n plantaardige tatoeë – ’n blommerangskikking wat kan plak, perfek vir matriekafskeid of enige formele byeenkomste.

Die vroue het geskitter met hul pragtige rangskikkings op hul arms.

Die demonstrasie vir hierdie vergadering was ’n pragtige tradisionele opwaartse halfmaan-ontwerp. Die ontwerp het ’n kleiner houer gehad, met groter, meer gewigtige plantmateriaal en fyn lyne wat ’n middelpunt omraam.

As ’n addisionele demonstrasie het Lenie Beukes ’n rangskikking gemaak met spasies wat duidelik sigbaar is. Die gasvroue vir die byeenkoms was Roz du Preez en Lenie Beukes, en hulle het heerlike peuselhappies verskaf.

Die volgende Teksa Blommeklub-vergadering sal op 15 Oktober in Secunda plaasvind.