Die vroue van Standerton het op 13 September by die NG Moedergemeente bymekaargekom vir ’n humoristiese vroueoggend aangebied deur Binnelanders-aktrise Je-ani Swiegelaar. Swiegelaar het die geleentheid gebruik om die vroue te bemoedig.

“Almal worstel met hul eie probleme, maar wys net die lekker,” het Swiegelaar geopen.

Sy het verduidelik dat sy gedurende 2024 die sakke onder haar oë verdien het. In haar toespraak het sy vertel dat sy weens vreeslike reënbuie in Desember verlede jaar in haar huis vasgevang was.

“Ek was gedwing om alleen te wees en my probleme te hanteer,” het Swiegelaar vertel.

Hoewel sy hierdie punt in haar lewe slegs kan beskryf as ’n gemoedsbekakking, hou sy aan om haar eie sukses te bepaal en behaal.

Swiegelaar het ’n stukkie wysheid wat sy vanaf haar oupa geleer het met die vroue gedeel. Volgens Swiegelaar het haar oupa graag stories gedeel wat lesse ingehou het wat vandag eers vir haar sinmaak.

Sy vertel dat haar oupa in sy jongdae weggeloop het van die huis af. Na ure se gestap het hy begin smag na water en kom toe op ’n waterpoel af waar hy 2l water in sy hande geskep het.

“Hy het met hierdie 2l water in sy hande geloop tot hy ’n boom in die v raakgesien het,” vertel Swiegelaar.

Soos hy al nader aan die boom gekom het, het hy al meer water gemors, maar steeds het hy met die 2l water in sy hande onder die boom neergeval.

Toe hy uiteindelik aan die water in sy hand kon begin drink, drup iets bo op sy kop.

“Hy besef toe dat hy onder ’n reuse skerpioen se angel gaan sit het,” het Swiegelaar vertel.

Hoewel hierdie storie beslis fiktief was, het Swiegelaar daaruit geleer.

“Ek het so gejaag na sukses, ek het nie besef dat ek onder my eie skerpioenangel gaan sit het nie,” het Swiegelaar gesê.

Daarom moes sy bepaal wat sukses vir haar beteken.

Swiegelaar het vertel dat sy besluit het om gelukkig te wees en sukses in haar bedryf te haal, maar heeltemal vergeet het van haar fisiese gesondheid.

Om hierdie te voorkom, het sy besluit om agt punte in haar lewe te implementeer om haar te help geluk, gesondheid en sukses te behaal.

Die eerste punt is ‘laat dit gaan’. Swiegelaar vertel dat sy gereeld ontsteld geraak het oor klein onderonsies.

LEES OOK: Evander Regional Court denies extension of bail to convicted security guard ahead of sentencing

“In so ’n geval moet jy soms mense net blok en ‘bless’, laat hulle gaan en wens hulle voorspoed,” het Swiegelaar gesê.

Haar tweede punt is om geleenthede van probleme te maak. Derdens, wil Swiegelaar haar kennis en beplanningsvermoë uitbrei. Haar vierde punt is om realistiese doelwitte te stel.

“Roetine en disipline is uiters belangrik om sukses te kan behaal,” het Swiegelaar gesê.

Haar sesde punt is om haarself te prioritiseer en ’n goeie bystandstelsel te bou. Volgens Swiegelaar is dit ook belangrik om jouself en jou mylpale te vier en laastens, om minder druk op haarself uit te oefen.

Die oggend was ’n sukses en vroue het weggestap met die belangrikste kennis wat Swiegelaar gedeel het, “Moet nie laat enige iemand jou dag opf@k nie, dit is jou dag, f@k hom self op.”