Laerskool Kalie de Haas, Laerskool Standerton en Haas Das het hande gevat met Solidariteit Helpende Hand om nie-bederfbare kos in te samel.

Volgens Jolene Greaves, adjunkhoof van Laerskool Kalie de Haas, het Braaf die Boerboel by die skool gekuier.

Braaf het vir die leerders in grade R tot drie opgetree en belangrike lewenslesse met hulle gedeel, soos hoe braaf dit is om foute te erken.

Die leerders het ’n nuwe dans geleer op die liedjie Braaf soos ’n Boerboel van Jan Jan Jan. Die onderwysers het ’n duisendpoot gebou met die kos wat ingesamel is. Dié reuse-duisendpoot is Saartjie gedoop.

Die kos wat die skole ingesamel het, is na Solidariteit Helpende Hand oorhandig, waar dit verdeel sal word tussen gesinne in nood.

Die skool wat die langste duisendpoot gebou het, het ’n wisseltrofee ontvang. Ná sy kuier by die skole, het Braaf die dorp ingevaar en by talle besighede gaan draai.