Die VLU Vaalrivier-tak het op 11 November by die huis van Belinda Wallis vir die laaste keer vanjaar vergader. Die vroue het sake bespreek terwyl hulle die pragtige uitsig oor die Vaalrivier geniet het.

Nadat die vroue lief en leed deurgegaan het, het Monica Swart die vorige vergadering se notule bespreek. Gerda Büter het die vroue vertel van kompetisie-artikels vir volgende jaar se konferensie, en almal het opgewonde begin gesels oor patrone en planne.

“Aktiewe VLU-lede ontwikkel nie maklik Alzheimer se siekte nie, omdat hulle breine aanhoudend ontwikkel,” het Büter gesê.

Die vroue het die vergadering afgesluit met ’n kreatiewe aktiwiteit, waar hulle Kersgeskenksakkies versier het. Belinda Wallis was die gasvrou vir die dag en het vir die vroue peuselhappies en kaaskoek met vars vrugte bedien.