Verblyden Slaghuis het op 30 November hul jaarlikse Kersmark met die hulp van Hande van Hoop gevier. Daar was talle heerlike eethappies, geskenke om van te kies en keur en lekker vermaak om markgangers vir ure besig te hou.

Volgens André du Plessis was die dag ’n sukses en volgende jaar se Kersmark beoog om selfs nog groter en meer pret te wees.

Riaan Lategan van Hande van Hoop was dankbaar vir hierdie geleentheid om meer geld in te samel ten bate van behoeftiges in die gemeenskap.

“Die Here seën ons baie goed met sulke geleenthede en ons is dankbaar vir ’n gemeenskap wat in ons belê en ondersteun,” het Lategan gesê.

Elke worsbroodjie wat verkoop is, het ’n aandeel gehad daarin om iemand anders se lewe te verander. Hoewel die reën gedreig het, was die dag ’n sukses.