Atletiekafrigter Janine Swanepoel (33) van Secunda en een van haar atlete Ernst Bellingan (16) het op 30 November iets nuuts probeer deur aan hul eerste Hyrox-kompetisie deel te neem.

Hulle moes in die afdeling vir 16 tot 24 jaar deelneem omdat die ouderdomme van die twee deelnemers bymekaar getel word en dan gehalveer word.

Hulle het 27ste in hul ouderdomsgroep geëindig. Hulle beoog om harder te oefen en dié plek met die volgende kompetisie te verbeter.

Hyrox behels dat die deelnemers verskillende soorte oefeninge by oefenstasies doen en tussen elke stasie 1 000m moet hardloop.

“Dit was baie moeilik en as jy foute maak of verkeerd tel, word jy gepenaliseer met tyd,” het Swanepoel vertel.

Dié twee atlete het vyf minute bygekry omdat hulle by een oefenstasie die hoeveelheid herhalings van die oefening verkeerd getel het en te min gedoen het.

“Dit was baie tegnies. Die manier hoe ’n mens die oefeninge doen, speel ook ’n groot rol. As jy nie goed voorberei nie, gaan jy sukkel,” het Bellingan gesê.

Swanepoel het eintlik meer CrossFit gedoen en meen dit behels bewegings en oefeninge soortgelyk aan gimnastiek. Swanepoel het so ’n maand voor die kompetisie haar dyspier geskeur en kon nie 100% gee toe sy vir dié Hyrox-kompetisie voorberei het nie. Sy kon net op ’n fiets oefen.

Bellingan het in sy laerskooldae reeds aan 100m en 200m wedrenne deelgeneem. Op hoërskool het hy meer op 400m begin fokus en nou wil hy aan 800m ook begin deelneem.

Hoewel Swanepoel voel die Hyrox-kompetisie was vir haar erger as om ’n 10km wedloop te hardloop sonder om te oefen, sal sy dit weer wil doen.