Die twee broers, Hendrik en Johan Keyser het op 20 Maart, 253km voltooi as deel van die jaarlikse Ligdraer-projek. Die gemeenskap het vir die week, vandat die projek afgeskop het op 16 Maart tot 20 Maart, daagliks die eerste 3km saam met die broers aangedurf.

Die geld wat tydens dié projek ingesamel is, gaan aangewend word om ’n kinderhuis, wat 90 kinders sal kan inneem, by Adullam Sendingstasie- en Skool wat tussen Evander en eMbalenhle geleë is, oop te maak.

Liné de Vries van die Tree Seeds-stigting, wat die Ligdraer-projek asook verskeie ander welwillendheids-projekte behartig, het gesê sy het gesien daar is ’n behoefte op Secunda en omgewing, vir ’n kinderhuis wat vir weerlose kinders ’n veilige hawe kan bied.

Hulle benodig steeds linne, gordyne, skool-items en kos vir die kinderhuis. De Vries het almal wat reeds ’n bydrae gelewer het in enige vorm, asook ondernemings wat reeds betrokke is, bedank.

Belangstellendes en vrywilligers is welkom om betrokke te raak. Hulle benodig ook professionele mense soos kontrakteurs met bou-ondervinding of enige iemand wat boumateriaal wil skenk.

Die bankbesonderhede vir dié projek is:

TREE SEEDS, FNB Business Account, rekeningnommer 63119911435, takkode 250 655.