Kleingoed van Delmas geniet Heidi Kleuterskool se atletiekdag
Die byeenkoms het op 25 April plaasgevind.
Heidi Kleuterskool op Delmas het weer vanjaar hul kleuteratletiekdag by Hoërskool Delmas aangebied.
Die byeenkoms het op 25 April plaasgevind en almal was daar – oupa en ouma, oom en tannie, mamma en pappa en boeties en sussies, want vanjaar se atletiek was ekstra groot.
Die kleuters van Rakkers Kleuterskool het saam in die atletiekpret gedeel.
Items waaraan die kleingoed deelgeneem het, is gewigstoot, ‘motorfietsresies’, hindernisbaan, hekkies en vele meer.
PlayBall het ook weer oudergewoonte vir groot vermaak onder die kleingoed gesorg.
Heidi Kleuterskool se hoof, Riëtte Wheller, het ouers wat by die verversingstalletjie gewerk het, bedank, asook Hoërskool Delmas vir die gebruik van hulle fasiliteite, die onderwysers en spesifiek die jong Heidi- en Rakker Kleuterskool-atlete vir hul deelname en bydrae tot die sukses van die oggend.
“Ons het ook vanjaar ons heel eerste ouer-en onderwyseraflos gehad. Dit was groot pret en ons hoop om dit voortaan ’n jaarlikse instelling te maak,” het Wheller laat hoor.
