Dankgebede in Bronkhorstspruit omdat Juca leef
Leonardo se familie het die byeenkoms as "wonderlik" beskryf en het die gemeenskap vir hul ondersteuning bedank.
Bronkhorstspruit se gemeenskap het op 19 Mei voor die Pick n Pay sentrum op die dorp saamgedrom om die Here vir die veilige terugkeer van Juca Leonardo (55) te loof.
Voertuie het dié aand tougestaan om in ’n alreeds vol parkeerterrein ’n moontlike spasie te kry.
Menige inwoners het die ysige weer trotseer. Talle het hande omhoog gelig terwyl gebede van dank gesê en geeslike liedere gesing is.
’n Gees van samehorigheid en dankbaarheid was hier tasbaar. Almal was dankbaar dat Leonardo, die eienaar van die Pick n Pay, se lewe gespaar is ná hy op 13 April voor die winkel ontvoer is.
In die 22 dae waartydens Leonardo gyselaar gehou is, het ’n taakspan van onder meer die polisie en veiligheidsdienste onverpoosd gewerk om sy vrylating te verseker.
Konstabel Munyadziwa Cathrine Ramovha, woordvoerder vir die Bronkhorstspruit polisie het op 6 Mei bevestig dat Leonardo met sy gesin herenig is.
Sy het vandeesweek gesê die ondersoek is steeds aan die gang om die ontvoerders vas te trek.
Leonardo was tot dusver nog stil oor sy ontberinge, maar die familie het Maandag hul stilswye verbreek om die gemeenskap vir hul ondersteuning en gebede te bedank.
Hulle het die Vrydagaand se dankseggingsbyeenkoms as ’n wonderlike gebeurtenis beskryf.
