Jong motorfietsryer verongeluk op Evander op Kersdag
Motorfietsryers betoon eer aan Vincent de Beer.
Vincent de Beer (22) is op Kersdag in ’n motorfietsongeluk op Evander dood.
De Beer het glo beheer oor sy motorfiets verloor en teen ’n boom in Rotterdamstraat vas gery.
Hy was van kleins af mal oor motorfietse en het as kind altyd saam met sy ma, Edith de Beer op haar motorfiets gery terwyl sy sussie, Sammy Wells, altyd saam met Edith se beste vriendin, Charlie Jansen van Rensburg, gery het.
De Beer was ook ten tye van sy dood ’n lid van die Clan 3663 Motorfietsklub.
Hy het by Midas en Motolek gewerk en het by ander ondernemings ook uitgehelp.
Jansen van Rensburg, wat De Beer sien grootword het, sal hom onthou as ’n liefdevolle en energieke mens.
“Hy was altyd besig en het ’n hart van goud gehad,” het Janse van Rensburg gesê.
“Hy het voluit geleef en altyd sy beste gegee in alles wat hy doen.”
Motorfietsryers van verskeie klubs op Secunda en die omgewing, het op 31 Desember by die Bulls Bar op Evander bymekaar gekom en na die ongelukstoneel gery waar hulle blomme gaan neersit het en daarna ook na die gesin se huis op Evander.
De Beer se roudiens het op 3 Januarie by die Bikers Church op Secunda plaasgevind.
Hy word oorleef deur sy ouers, Johan en Edith de Beer en suster, Sammy Wells.
