Gholfers laat stokke swaai om Jason English (12) te help

Standerton gemeenskap het die gholfstokke laat swaai op Woensdag, 18 September om geld vir Jason Engelish (12) in te samel. Jason is April vanjaar met kanker in sy sinusholtes gediagnoseer.

September 25, 2019

San-Marié Cronjé 1 minute read

Pieter Vermaas, Ferdie Prinsloo (wenner), me. Alta Mynhardt, Stephan Mynhardt (wenner), Faan Mynhardt en Sarel van Heerden voor die afslaan. (Foto: Verskaf)

Standerton se gemeenskap het die gholfstokke laat swaai op Woensdag, 18 September om geld vir Jason English (12) in te samel.

Jason is April vanjaar met kanker in sy sinusholtes gediagnoseer.

Hy het reeds ‘n operasie ondergaan, maar moet vir nege maande chemoterapie kry.

Sy ma, me. Mariaan English, neem hom deur na Pretoria omdat die behandeling daar gedoen word. MRS Scrap Holdings het die inisiatief geneem om ‘n gholfdag op Standerton aan te bied.

Stephan Mynhardt staan op Woensdag 18 September gereed om af te slaan. (Foto: Verskaf)

Almal wat pryse gewen het, het hul pryse teruggegee waarna dit opgeveil is.

Hulle het ‘n totaal van R40 000 ingesamel.

Me. Alta Mynhardt van MRS Scrap Holdings, het gesê: “Dit was vir my so lekker om te sien dat dit vir ‘n slag die manne is wat ‘n geldinsameling dryf. Ons is dankbaar vir elkeen wat deelgeneem het.”

Stephan Mynhardt en Ferdi Prinsloo het die dag met 48 punte gewen.

Riaan en Ronel Starbuck was tweede met 46 punte en Aldo Arnaldi en Patrizia Lombard was derde met 46 punte.