Loffies se ‘lente-lawaai’ laat leerders en onnies lekker laf
Ten spyte van die standaard protokol wat steeds baie streng gevolg moet word te midde die Covid-19-pandemie, kon die leerders lekker vrolik en laf aantrek vir die Lentedag.
Dit is heerlike lente en die winter is verby.
By Laerskool Eloff het leerders en onderwysers ’n heerlike sonnige dag in die buitelug gevier en sodoende die lente met ope arms verwelkom.
Die leerders en onderwysers het op Woensdag, 1 September, op die rugbyveld en pawiljoen bymekaargekom.
Ten spyte van die standaard protokol wat steeds baie streng gevolg moet word te midde die Covid-19-pandemie, kon die leerders lekker vrolik en laf aantrek vir die Lentedag.
Die leerders het per graad hul danspassies uitgevoer, hul vrolik uitrustings afgewys en was daar dan ook per graad ’n wenner aangewys.
Hierna was dit die beurt van die onderwyseresse om hul uitrustings en danspassies vir die leerders te wys en het me. Erika Duvenhage met die wen prys weggestap.
Na afloop van die verrigtinge was Loffies se leerders lekker honger en dors en kon hulle gaan pouse hou waarna die normale skooldag weer sy gang gegaan het.
Me. Louise van Niekerk het Hoffies Rose bedank wat vir elke onderwysers met ’n roos bederf het.
“Gewoonlik is Lentedag maar bitter koud, maar vanjaar was so ’n heerlike warm dag. ’n Perfekte dag om Loffies se ‘Lekker-Lawwe-Lente-Lawaai’ te vier.
“Dit was ook ’n voorreg om die Loffies weer ’n bietjie in die buitelug saam te laat kuier,” het me. Van Niekerk gesê.
