Twee rolbalspelers van Hoërskool Bastion het onlangs goed gevaar toe hulle aan die Suid-Afrikaanse Nasionale Junior Rolbalkampioenskappe deelgeneem het.
Matriekleerder Amelia Diedericks en hoofseun Zacko Theron het van 28 Maart tot 1 April aan dié kampioenskappe in Bloemfontein deelgeneem.
Vyftien o.15-spanne en 30 o.20-spanne van distrikte regoor Suid-Afrika, insluitend Kaapstad, Durban, Potchefstroom, Vrystaat en Gauteng, asook Namibië het aan die kampioenskappe deelgeneem.
Spelers onder die ouderdom van 20 het met groot ywer hul distrikte op die rolbalbane verteenwoordig in die formaat van vier spelers per span, ook bekend as Fours.
Amelia het die Sables o.20B-span verteenwoordig, terwyl Zacko vir die Sables o.20A-span gespeel het. Amelia se span het 27ste geëindig, terwyl Zacko se span ‘n algehele sewende plek verower het.
Hoërskool Bastion is trots op die rolbalspelers en hul puik prestasies.
