Die Drie Ou Ballies, bekend vir hul liefdadigheidsfietstogte deur Suid-Afrika, vat binnekort weer die pad – dié keer vir hul grootste uitdaging nóg: ’n rit van Pretoria tot by Swakopmund in Namibië.

Volgens oorspronklike Ballie-lid Eddie Steyn was hul eerste rit in 2024 Kaap toe (1 640km), asook verlede jaar se rit na Port Edward (875km), niks in vergelyking met wat hulle vanjaar aanpak nie.

“Verlede jaar was ons nie drie ou ballies wat gery het nie, aangesien my twee mederyers dit nie kon maak nie. Hierdie jaar het ek ’n hele nuwe span ingetrek, en kan ons onsself weer met trots as die Drie Ou Ballies voorstel.”

Vernon Dinkleman, wat vanjaar saam met Eddie die tog aanpak, sê hy berei hard voor vir die rit.

“Ek het al in matriek ernstig begin fietsry toe ek en ’n vriend Kaap toe gery het,” sê Vernon.

“My laaste groot rit was die Joburg2c-bergfietswedren vir my 50ste verjaardag 10 jaar gelede.”

Vernon voeg by dat hy ongeveer ’n jaar gelede in ’n ernstige motorfietsongeluk betrokke was en 17 dae in intensiewe sorg deurgebring het, waarna hy verskeie operasies moes ondergaan.

“Ek is omtrent die bioniese man met al die skroewe wat my lyf aanmekaar hou,” lag hy.

Eddie (69) het ook al verskeie mediese uitdagings oorkom en het reeds vier rugoperasies en ’n heupvervanging ondergaan.

Geraldt Kok, wat vanjaar die ondersteuningsvoertuig bestuur, sê die rit word, soos gewoonlik, ten bate van ’n liefdadigheidsorganisasie aangepak.

“Ons ry hierdie jaar ter bewusmaking en om geld in te vorder vir die Orthocross Amputee Foundation, ’n nie-winsgewende organisasie wat hulle beywer om mense te help om kunsledemate te bekom.

“Die doel is om soveel mense as moontlik te help om die prostese wat hul lewens ten goede sal verander te kan kry.”

LEES OOK: Ruimsig parkrun veteran celebrates 250th milestone

Volgens Geraldt kan moderne prostese soveel as R200 000 kos.

“Daar is tegnologie wat tans ontwikkel word wat die prys moontlik kan halveer, maar dis steeds ’n aardige bedrag geld om mee vorendag te kom.”

Die rit begin op Saterdag 16 Mei by die Castle Walk Winkelsentrum in Pretoria, met die eerste skof wat by Constantia Kloof eindig.

“Sondagoggend spring ons weg na Potchefstroom, en ons beplande oornagstoppe sluit Delareyville, Vryburg, Kuruman, Olifantshoek en Upington in, voordat ons die grens by Nakop na Namibië oorsteek.

“Daarvandaan beweeg ons deur Namibië tot by Windhoek. Die rit eindig in Swakopmund.”

Eddie voeg by dat die beplande reistyd tussen 22 en 26 dae sal wees, afhangend van onder meer die weerstoestande.