Suid-Afrikaanse pensionarisse kry swaar, baie swaar

As ‘n pensionaris het die uwe eerstehandse kennis van die finansiële probleme wat ons oues van dae deesdae in die gesig staar. Veral omdat ek weens die gesondheidsprobleme van mev. Pretorius geruime tyd reeds al die inkopies by die supermarkte en elders doen. Sedert die Covidtyd al, en ek is verstom oor die prysstygings in die supermarkte oor die afgelope paar jaar. Dis erg.

Die supermarkte moet derduisende rande elke maand opdok om beurtkrag met hul kragopwekkers te oorkom, en wie betaal vir die diesel? Nie hulle nie, kyk maar na die winssyfers. Dan praat ek nie eers van mediese en hospitaalkoste nie. Selfs al het pensionarisse goeie mediese fondse, kom daar aan die einde van die jaar ‘n afsnypunt wanneer die medisyne-voordele uitgeput is.
Veral wanneer ‘n egpaar om en by tagtig jaar oud ‘n handvol chroniese kwale het. Om nie van tandheelkunde te praat nie.

As ‘n tandarts te veel tande op een slag stop/versorg, betaal die mediese fonds nie want dis teen die reëls. Wanneer ‘n pensionaris noodgedwonge na ‘n top-spesialis moet gaan vir behandeling, hoor hy die dokter is uitgekontrakteer, en moet ‘n paar duisend uit sy eie sak betaal voordat die spesialis hom behandel. En wanneer hy dan by die fonds terugeis, word net ‘n deel van die tarief betaal omdat die dokter se tariewe hoër is as dié wat deur die fonds goedgekeur is. Om nie te praat van die probleme van pensionarisse met geen mediese fonds nie. Hoeveel erger is dit nie.

Ek kan nog talle voorbeelde noem, en die talle pensionarisse op die Suidkus sal weet waarvan ek praat. Hulle kry swaar. Om hierdie rede deel ek wenke van die organisasie Skuldhulp met ons lesers wat ek pas raakgelees het. Dit is op Afrikaans.com beskikbaar, en bevat nuttige wenke waaraan ‘n mens nie altyd dink nie. Hier is ‘n verkorte weergawe:

Die artikel lui die Suid-Afrikaanse pensioenstelsel word as een van die laagstes ter wêreld gereken. Volgens die onlangse 2023 Allianz Pensioenverslag word Suid-Afrika saam met lande soos Kenia en Libanon gegroepeer. Die Mercer CFA Global Pension Index plaas Suid-Afrika met sy middelmatige C-graadtelling in die 34ste plek uit 44 lande. Die perfekte storm: Die las van stygende koste vir Suid-Afrikaanse pensioentrekkers. Die finansiële druk is werklik, en kan nie geïgnoreer word nie.

Suid-Afrika se pensioentrekkers worstel met ‘n paar finansiële bekommernisse. Ons almal weet dat gesondheidsorg geen grap is nie, maar ten spyte van die koste daarvan, is dit ‘n noodsaaklike aspek van ons lewens, veral as ons ouer word. En sonder ‘n privaat mediese fonds kan ons afgetredenes hulle vir ure, selfs dae of maande sonder behandeling bevind in fasiliteite wat veel te wense oorlaat. En dit is net die begin daarvan.

Dan is daar die stygende behuisingskoste. Voeg daarby stygende voedselpryse en waarskynlik ook vervoerkoste om in ag te neem, om nie eens te praat van water en ligte nie (en die nimmereindigende bykomende koste van die bestuur van beurtkrag of kragonderbrekings wat dae lank kan duur).

Praktiese oplossings vir pensioentrekkers: Al ooit van Stokvels gehoor? Hierdie gemeenskapspaarklubs is redelik handig, want hulle gee jou ‘n goeie enkelbedrag om te help met daardie onverwagte uitgawes. Die konsep is eenvoudig: Kry vyf betroubare vriende om elke maand R50 by te dra, en voila, elke vyf maande het jy ‘n ekstra R250. Vaardigheidsgegronde verdienste: Begin ‘n klein onderneming tydens aftrede. Dink so bietjie. Waarmee is jy regtig goed? Miskien het jy ‘n aanleg vir brei, ‘n voorliefde vir verf, of dalk is jy die plaaslike ghoeroe van tuinmaak.

So, wat daarvan om daardie vaardigheid van jou in ‘n ekstra inkomste te omskep?

Bankslim: Laat jou geld vir jou werk. Bankfooie kan ‘n groot oorlas wees, veral wanneer elke sent tel. As jy ‘n selfoon het, is daar goeie nuus wat na jou kant toe kom. Het jy geweet daar is ‘n paar aanlyn banke in Suid-Afrika, waarvan sommige minimale of geen bankkoste verhaal nie?

Ja, jy het reg gelees – geen bankkoste nie! Die beste deel? Jy kan jou SASSA-toelae direk in jou bankrekening laat inbetaal. Boonop kan enige geld wat in jou rekening lê, rente verdien.

Van rand tot rand: Die belangrikheid van ‘n begroting. “Hoekom moeite doen met ‘n begroting? My geld verdwyn sodra dit inkom.” Dit is hierdie soort denke wat ons buite beheer kan laat voel. Dit is hoekom beplanning so voordelig is. Selfs die kleinste begroting kan baat vind by ‘n mate van struktuur. Weet waarheen jou geld gaan – elke sent daarvan – want, wanneer jy jou uitgawes dophou, begin jy patrone en spaargeleenthede raaksien wat jy andersins nie sou gesien het nie.

Ontsluiting van waarde: Spesiale aanbiedinge en afslag vir pensioentrekkers. Jy sal verbaas wees oor die aantal kettingwinkels wat ‘n reddingsboei vir pensioentrekkers uitgooi met hul afslagte en spesiale aanbiedinge. Jy moet net weet waar om te kyk. Einde van artikel.

Die volle weergae, wat baie meer besonderhede en wenke bevat, is op Afrikaans.com beskikbaar, asook op die webwerf van Skuldhulp, die sustermaatskappy van Debt Rescue. Hulle spesialiseer in skuldberading in Afrikaans, en sal pensionarisse kan help om gemoedsrus or hul finansiële situasie te kry. Gaan kyk gerus.

HAVE YOUR SAY

Like the South Coast Fever’s Facebook page