Die vingers het flink gewikkel en die hekel- en breinaalde het behoorlik geklap om soveel as moontlik komberse gereed te kry vir dié wat dit hierdie winter benodig.

Die 30-uur lange Afrikaanse Taal- en Kultuurvereniging (ATKV) se landswye Hekel- en Breimarathon het Vrydag, 26 Mei om 12:00 afgeskop en Saterdag, 27 Mei om 18:00 klaargemaak.

Sowat 1 500 mense op 90 verskillende plekke oor die land het aan dié projek deelgeneem.

’n Groepie plaaslike vroue het ywerig deelgeneem en het by Klawer Flyt aangemeld gereed en gewapen met brei- en hekelnaalde, genoeg wol en genoeg drink- en eetgoed om hulle die nag deur te sien.

“Ons groepie vroue wat deelgeneem het kon daarin slaag om 31 komberse klaar te maak en daar is nog wat moet inkom, so ons gaan omtrent 40 komberse kan bydra van eMalahleni af,” het Zenobia de Jager gesê.

Die vierkantblokkies van 20 x 20 cm (granny square) word na ’n sentrale punt gestuur waar dit geheg word. Elke kombers bevat sowat 44 blokkies.

Die komberse word dan van daar af versprei na bejaardes, plekke van veiligheid en kinderhuise waar daar behoefte is.

“Dit was so lekker en die vroue het besluit om sommer nou reeds te begin hekel en brei vir volgende jaar se projek,” het Zenobia gesê.

Mense wat graag wil deel word van die groepie om ’n verskil in iemand se lewe te maak, kan by Klawer Flyt (Winkel 17, Wersia-gebou, Jeanettestraat, Del Judor) gaan aanklop vir meer inligting.

Het jy ’n storie om te vertel?

Stuur vir ons ’n epos na info@witbanknews.co.za of bel ons by 013 656 2490

• Vir meer brekende- en gemeenskapsnuus, besoek gerus ons webtuiste.
• Jy kan ons ook volg op sosiale media platforms: Facebook, Twitter of Instagram

HET JY GEWEET?

Kliek op die woorde wat in kleur uitgelig is om meer te lees oor verwante temas.