Die vroue van die VLU Nocturne-tak het weer eens hul gewilde Wit Olifant-verkoping aangebied.
Dit was ’n fees van tweedehandse vondse, met tafels wat behoorlik gekreun het onder die gewig van ’n wye verskeidenheid items – van dekor en huishoudelike ware tot klere en boeke.
Die kooplustiges het reeds vroegoggend op die tafels toegesak, en dié wat die beste items wou kry, moes vinnig besluit.
Een spesifieke tafel het veral die skare gelok – klere, insluitend hemde, denims, bloesies en nog vele meer, teen die ongelooflike prys van slegs R20 per stuk.
Die aroma van varsgebakte pannekoek het deur die lug gewaai, en ’n groot aantrekking was die heerlike springmielies met ’n verskeidenheid geurige soute.
Die feesatmosfeer was tasbaar, met laggende gesigte en vol hande.
Met die sukses van hierdie verkoping is dit duidelik – Nocturne-tak weet hoe om ’n gemeenskapsgeleentheid te skep wat mense bymekaar bring, en die volgende Wit Olifant-verkoping gaan beslis weer ’n hoogtepunt wees!
“Ek wil net die gemeenskap bedank vir hul ondersteuning asook diegene wat hul tyd en items geskenk het om die verkoping ’n sukses te maak. Elke aankoop en bydrae help ons om voort te gaan met ons gemeenskapsprojekte,” het die tak se voorsitter, Wilma van Zyl gesê.
Nuus wat saak maak … Volg WITBANK NUUS op ons webtuiste, Facebook, Twitter, Instagram of TikTok
Gesels met ons: info@witbanknews.co.za
