Vrou vind twee oorledenes se as – wil dit graag terugbesorg
Die as van twee mense is tussen verkoopte huisraad in Malelane gevind. Die vermoede bestaan dat hulle van eMalahleni afkomstig is.
’n Tweedehandse winkel-eienaar het meer gekry as wat sy verwag het toe sy onlangs huisraad opgekoop het.
Rina Hough van Malelane, aan wie die tweedehandse winkel behoort, is nou op soek na familie of kennisse wat die oorledenes geken het.
Die as is in ’n boks tussen die ander huisraad gevind.
“Dit is ongelooflik hartseer. Hierdie is iemand se geliefdes, iemand se pa, broer of seun,” het Hough gesê.
Die papierwerk dui daarop dat een oorlede Hendrik Johannes Viljoen is wat op 10 Januarie 2002 veras is. Hy is op 5 Mei 1930 gebore en op 2 Januarie 2002 oorlede.
Die verassing het in eMalahleni plaasgevind.
Die tweede inskrywing op een van die nissies is Thomas Sarel van Dyk wat op 26 Januarie 2007 oorlede is.
Sy hoop dat iemand sal hand-opsteek en help om die eienaars van die as op te spoor.
As enigiemand inligting het, word hulle versoek om haar te kontak: 071 886 9747.
Nuus wat saak maak … Volg WITBANK NUUS op ons webtuiste, Facebook, Twitter, Instagram of TikTok
Gesels met ons: info@witbanknews.co.za
