Oud-Klippies juffrou tydens roerende roudiens gegroet
“Mamma het só dikwels vir ons vertel hoe lief sy is vir Jesus. Daarom glo ons dat sy reeds is waar sy nog altyd wou gewees het, in die Hemel.”
Juffrou Rita Etsebeth, ‘n geliefde oud-onderwyseres van Laerskool Klipfontein, is vandag met ‘n roerende roudiens finaal gegroet.
Sy is op 5 Oktober oorlede na ‘n siekbed wat vier maande gelede begin het toe sy ‘n beroerte gehad het, waarna haar gesondheid geleidelik agteruitgegaan het.
Rita het haar lewe aan onderwys gewy en het vir net meer as 48 jaar lank skoolgehou.
Haar eggenoot, Fanie Etsebeth, het vertel van hul diep verbintenis. Hulle het slegs ‘n paar dae voor haar afsterwe, op 29 September, hul 52ste huweliksherdenking gevier.
“Ons het ‘n wonderlike lewe saam gehad, en sáám die Here gedien. Sy is my sielsgenoot, liefling vroutjie en wildtuin maatjie,” het hy tydens die roudiens gesê
Rita laat haar man, Fanie, haar kinders Marius, Marlé en Karlien, asook haar kleinkinders agter.
