Plaasaanvallers slag 2 beeste tydens plaasaanval
In die jongste voorval, wat gisteraand ná 23:00 plaasgevind het, is twee plaaswerkers op 'n plaas naby Bulpan aangerand.
Boere in die Bulpan-area is op hoë gereedheidsgrondslag na ‘n tweede plaasaanval in die omgewing.
Twee werkers wat op een van die plase in die omgewing bly, is gisteraand aangerand toe vyf plaasaanvallers die houtdeur van die huis waarin hulle bly, met ‘n panga oopgekap het om in te kom.
Piet Wassenaar, die eienaar van Presidio Sekuriteit, het die plaas vanogged besoek en vertel dat die plaaswerkers darem nie ernstig beseer is nie.
Een van die plaaswerkers is met ‘n panga onder sy voet gekap.
“Die eienaar van die grond bly nie self op die plaas nie en sy twee plaaswerkers bly in die huis. Net na 23:00 het hulle die honde gehoor blaf en die vyf mans gesien. Die vyf het vir die plaaswerkers geskree om die houtdeur oop te maak en toe hulle weier, is die deur oopgekap.”
Die aanvallers het die twee plaaswerkers vasgebind en die huisraad op ‘n trekker gelaai.
“Hulle het twee beeste geslag en twee honde vergiftig,” het Wassenaar gesê.
Net na 04:00 het hulle padgevat met die trekker, maar by ‘n laagwaterbruggie in die modder vasgeval.
Wassenaar het vertel dat die rowers terug is plaashuis toe om die vasgebinde plaaswerkers te gaan haal om te help om die trekker uit die modder te stoot.
Die plaaswerkers het vertel dat die trekker nie uit die modder gestoot kon word nie en ‘n bakkie opgedaag het. Die aanvallers het al hul buit op die bakkie gelaai en gery.
Een van die honde is dood, en Wassenaar het gesê dat die tweede hond is betyds gevind.
*Die eerste plaasaanval op 2 Oktober het in dieselfde omgewing plaasgevind. Twee huise op ‘n plaas is aangeval en goedere gesteel.
Nuus wat saak maak … Volg WITBANK NUUS op ons webtuiste, Facebook, Twitter, Instagram of TikTok
Gesels met ons: info@witbanknews.co.za
