Borskankermaand op hoë noot afgesluit

Meer as 500 deelnemers het aan die Bettie Bandana pretloop deelgeneem. Hierdie pretloop het baie harte geraak.

November 4, 2025

Zita Goldswain 1 minute read

Die strate om Highveld Mall was die naweek pienk gekleur toe meer as 570 stappers en hardlopers aan die Bettie Bandana pretloop deelgeneem het.

Die pretloop wat op 25 Oktober plaasgevind het, was meer as net ‘n geleentheid om die tekkies aan te trek en gou ‘n 5km in te werk.

Vir party was dit ‘n emosionele en inspirerende viering van die lewe, want byna ‘n derde van die deelnemers het ‘n persoonlike verbintenis met kanker, hetsy self die siekte oorwin het, of ‘n geliefde na aan hulle het die stryd teen kanker gevoer of voer steeds die stryd.
Van die organiseerders se kant af was daar baie dankbaarheid.

“Baie dankie vir jul ondersteuning om vanjaar se Bettie Bandana so ‘n reusesukses te maak. Al 570 deelnemers het saamgekom in herinnering van Retha van Greunen wat gewaarwording omtrent borskanker en hoop gedeel het,” het Sharlene Doogan, een van die organiseerders gesê.

Nicola Blake, bemarkingsbestuurder van Highveld Mall, het gesê, “Baie dankie aan elke deelnemer, ondersteuner en vrywilliger asook huurders in Highveld Mall wat die dag moontlik gemaak het. Hierdie pretloop het soveel harte geraak. Kom ons dra Retha van Greunen se woorde saam met ons, ‘Jy is sterker as wat jy dink!'”