’n Tiener van Blancheville is twee selfone kwyt nadat hy die naweek in Fleurlaan beroof is.

Die seun, wat anoniem gehou word op aandrang van sy ouers, was op pad terug van ’n nabygeleë selfoonwinkel toe hy op 21 November beroof is.

Sy ma het gesê hy was op pad terug huis toe, toe ’n man hom gevra het om te help, want hulle sukkel om visgoed te laai.

“Hy het nee gesê en toe hy wou aanloop, het die man hom aan die arm gegryp en gesê hy moet die foon gee. Die man het gevra of hy nog iets by hom het, en toe hy nee sê, het die man begin voel en die ander foon ook gegryp,” het die ma gesê.

Volgens die tiener het die twee mans in die bos by Secondstraat ingehardloop en verdwyn.

’n Leser wat die mamma se waarskuwing op Blancheville se WhatsApp-groep gelees het, het gesê dit is nie die eerste keer dat iemand naby die bos in Secondlaan beroof word nie.

Hy het gesê dis ’n tendens wat al ’n geruime tyd aan die gang is in die omgewing van die bos.

Hy weet van ’n voorval twee jaar terug waar iemand ook van ’n selfoon beroof was.

Volg WITBANK NUUS op ons webtuiste, Facebook, Twitter,  Instagram of TikTok

Gesels met ons: info@witbanknews.co.za