Bekkige spanredenaars onder top 5 SA spanne
Laerskool Orion bars behoorlik van trots en spog met 4 uit die 5 top SA redenaarspanne vir hul onderskeie grade
Vier van Laerskool Orion se redenaarspanne is as van die top vyf spanne in Suid-Afrika in hul onderskeie grade aangewys.
Die spanne is onderskeidelik in grade twee, vier, ses (span 1) en sewe aangewys.
Hierdie spanne het nou die voorreg om op 14 Oktober aan die landsfinaal by ATKV Buffelspoort deel te neem, waar hulle teen van die beste spanne in Suid-Afrika gaan meeding.
“Dit is werklik ’n uitsonderlike prestasie en iets waarop ons as skool ongelooflik trots is. Om onder die beste in die land gereken te word, getuig van harde werk, selfvertroue, talent en uitstekende voorbereiding,” het Danny Last van die skool gesê.
“Baie geluk aan elke leerder en afrigter wat deel is van hierdie besonderse prestasie. Ories, julle maak ons trots. Sterkte met die landsfinaal – die skool staan bankvas agter julle.”
