Louine blom agter die verfkwas

Sy verkoop items soos skilderye en kunswerke soos geverfde borde en ander huisversierings.

September 29, 2021

Tayla Smit 1 minute read

Witfield se Louine Pretorius het haar passie vir kuns in ‘n mikro-onderneming, Louine’s Creative Art and Paintings, omgeskakel.

Die Advertiser, wat die gemeenskap uitnooi om te spog met hul tuisgemaakte en handgemaakte produkte, het meer gaan uitvind oor Pretorius se werk.
Pretorius, ’n voormalige distrikfasiliteteerder by Ekurhuleni-Suid, het haar liefde vir kuns ontdek nadat sy in 2016 die tuig neergelê het.
“Nadat ek afgetree het was ek vir so 15 maande in die Weskus. Daar het ek mooi skilderye gesien wat my belangstelling geprikkel het. Ek het vir klasse gegaan. ‘n Vriendin van my in Langebaan wat altyd buite die boks dink het my ook geïnspireer.

“Kuns is vir my ‘n hartsding en ek geniet dit baie. Ek mis die Weskus waar mens heeltyd blootgestel word aan kuns. Maar die onderwys het my geroep en nou los ek af by Hoërskool Elspark, waar ek sosiale wetenskap aanbied,” het sy gesê.

Die talentvolle kunstenaar het verduidelik dat sy in 2017 begin het om haar kuns te verkoop. Sy verkoop items soos skilderye en kunswerke soos geverfde borde en ander huisversierings.

Volgens Pretorius help die verkope van haar kunswerk haar finansieëel.
“Beide my kinders het hul werk verloor weens Covid-19 en die geld wat ek uit my kuns gemaak het, het my gehelp om hulle te ondersteun. My verkope doen goed. Dit het veral goed gegaan tydens die harde inperking omdat ek my werke op Facebook verkoop en mense meer tyd gehad het om op sosiale media te wees.
“Ek het ook onlangs ‘n suksesvolle kunsuitstalling by my huis aangebied en ek hoop om dit weer in die toekoms te doen,” het sy verduidelik.
Haar boodskap aan kunstenaars en mense wat swaar getref is deur Covid-19: “Jy moet die beste jy wees en jou droom uitleef. Distansieër jouself van wat ander doen en volg jou hart.”

Pretorius kan op 082 337 9598 of op louinela@gmail.com gekontak word.