Twee prag motorfietse in brand vernietig
Die vinnige optrede van bure asook die brandweer het Maandagoggend verhoed dat ‘n brand, wat in ‘n motorhuis van ‘n huis in Minnebron ontstaan het, na die res van die huis versprei en groter skade aanrig het.
Die brand is beperk tot die motorhuis en ten spyte van die feit dat twee waardevolle motorfietse totaal uitgebrand het, is die eienaars verlig dat die brand nie verder versprei het nie.
Ben en Swanette Lavin van Kalkstraat het Maandagoggend groot lof gehad vir hul bure en selfs vreemde mense wat gou opgetree het.
Swanette het aan die Herald gesê dat sy ongeveer 8vm nog in die motorhuis was voordat sy gery het.
“Ek was skaars op die hoek van ons straat toe my buurman, André Viljoen, my bel en sê dat die motorhuis brand,” het sy vertel.
Ons tuinhulp het intussen probeer om die vlamme met die tuinslang te blus en ander weldoeners het ook gepoog om goed uit die motorhuis te kry.
Volgens Swanette was verskeie brandweerwaens gou op die toneel en is die vlamme onder beheer gebring.
‘n 2013 BMW motorfiets en ‘n seldsame 1979 model (ook ‘n BWW) het egter in die slag gebly en is heeltemal vernietig.
Daar was ook gasbottels in die motorhuis wat gelukkig nie ontplof het nie.
“Ons is baie dankbaar teenoor almal wat die nooddienste gebel het en vinnig nader gestaan het om te help,” het Swanette gesê.
