‘n Jong lid van die XKT-klub in Brakpan, MJ Beets (11), het goud en silwer verwerf tydens die onlangse South African Kickboxing Association (SAKA) se Nasionale Skopbokskampioenskappe in Oudtshoorn.

Met meer as 1 400 deelnemers wat tydens die kampioenskappe die matte betree het, moes MJ homself staal teen strawwe mededingers.

Tydens sy deelname in die puntegeveg-afdeling het hy boaan die punteleer geëindig en goud gewen, asook silwer in beide die ligskop- en deurlopende afdelings.

Dié graad Vyf-leerder van die Laerskool Baanbreker het besonders presteer op nasionale vlak, wat ‘n getuienis is van sy toewyding om voortdurend te verbeter.