Brakpan VLU ontken Olienhout, Witkruisvleivalk
Die aanbieding oor die streek se gekose bome en voël van die jaar is deur Wella Davie gegee.
Die Vroue Landbou Unie (VLU) is meer as net ’n sosiale kring vir ouer vroue, maar verryk die kennis en ervaring van enige lidvrou wat aansluit.
Brakpan VLU het Dinsdag, 11 Augustus, bymekaargekom vir hul maandelikse vergadering by die Just Wheels Motorklub se klubhuis, waar hulle meer te wete gekom het oor die streek se studievelde, asook die boom en voël van die jaar.
Die aanbieding oor die twee onderwerpe is deur Brakpan-lid Wella Davie gegee, en sy het vertel van die olienhout, rooi-ivoor en witkruisvleivalk.
Die olienhout, ’n subspesie van die olyfboom, kom wydverspreid in Suider-Afrika voor en groei goed in droë gebiede, waar dit ook goed bestand is teen ryp.
Dit is ’n gewilde tuinplant weens sy aanskoulike groeivorm, met blomtyd tussen Oktober en Februarie.
Die blomme is groen tot wit en ruik baie lekker, hoewel die vrugte wat daaruit voortkom bitter is en meestal net deur groter voëls geëet word.
Die tweede boom van die jaar, die rooi-ivoor, is inheems aan Suider-Afrika en kan in klipperige bosveld aangetref word.
Die hout is ’n dowwe rooi kleur, en kieries en knopkieries wat van die hout gemaak word, mag tradisioneel slegs deur Zoeloe-koninklikes gebruik word.
LEES OOK: Minnebron egpaar vier huwelik van ses dekades
Die witkruisvleivalk is die voël van die jaar, waarvan daar na raming minder as 500 in Suid-Afrika oor is.
Wanneer hulle sit, vertoon hulle swart, maar wanneer hulle vlieg, ontbloot hulle hul skouspelagtige swart-en-wit vere.
Hulle kom in bergagtige fynbos voor en broei veral in die oop, bergagtige fynbos in die Wes-Kaap.
Na die aanbieding het die vroue ’n demonstrasie oor lapverf geniet, waarna hulle die nuwe vaardighede op hul eie stuk lap kon oefen.
LEES OOK: Annual Women’s Day celebration for women in need held
