Spanne van die Scorpions Rugbyklub het die afgelope naweek hul krag teen die Harlequins Rugbyklub gemeet tydens ligawedstryde wat op die Harlequins se velde in Krugersdorp gespeel is.

Volgens die klubbestuurder, Joe Bosch, moes al drie van die Scorpions se spanne ongelukkig die knie buig teen die sterker opponente. Die o.19-span het met 22–76 verloor, die tweede span met 0–55, en die eerste span is met 14–73 geklop.

“Ons ouens se harte is reg. Hulle gee hul alles en hulle geniet elke oomblik,” het Bosch gesê.

Die Scorpions het nog drie ligawedstryde vir die seisoen oor. Die volgende wedstryd is op 12 Julie teen die Wasps, en gaan op die velde van Hoërskool Wonderfontein beslis word.