Atlete van Hoërskool Carletonville het die afgelope naweek tydens die Gauteng Atletiekkampioenskappe in Germiston presteer.

Mikayla Smit het uitstekend gevaar en gekwalifiseer om aan die SA’s deel te neem in die afdeling vir dogters o17 200m en 4 x 100m-hekkies.

“Hierdie is ‘n merkwaardige prestasie. Ons wens ook Rian Mostert geluk met sy agtste plek in die seuns o17 Diskus, asook Xolani Kotoi met sy vierde plek in die seuns o19 110m-hekkies,” sê die skool se woordvoerder, Sandra Venter.

Die skool het ook vir Mikayla sterkte toegewens met haar komende deelname aan die Suid-Afrikaanse kampioenskappe wat in Rustenburg gaan plaasvind.