Volgens polisiewoordvoerder, A/O Madeleine von Wielligh is skelms deesdae weer aktief besig om mense uit hul geld te bedrieg.

Tydens ‘n voorval by een van die ABSA OTM’s vanoggend, is ‘n man op ‘n slinkse wyse van sy kaart beroof en ‘n bedrag van R1 000 kwyt. Die man het sy bankkaart in die gleuf gedruk en sy persoonlike pinnommer ingesleutel, maar ‘n boodskap op die skerm het aangedui dat hy die verkeerde pin ingevoer het en die kaart het binne die tellermasjien agtergebly.

Die bankkaart is egter verwyder terwyl sy aandag deur twee ander mans in sy nabye omtrek aftrek is en minute later is ‘n bedrag van R1 000 elders in die dorp uit sy rekening getrek.

Die polisie waarsku inwoners om indien moontlik, nooit die OTM alleen te besoek nie. Indien jy wel alleen is, maak seker dat jy die sleutelbord bedek wanneer jy jou pinnommer insteutel. Moenie hulp van ander persone in die omtrek vra of aanvaar nie en maak dadelik alarm indien jy onraad bemerk.