Dié speelse seerowertema dateer terug na die groep se eerste skooldag sewe jaar gelede, toe hulle as haasbekkies onder dieselfde tema by die skool verwelkom is.

Volgens Madéle van Vuuren (hoof) is dit belangrik vir leerders om terug te keer na ‘n plek waar veilige onderwys toegepas word, maar met ‘n speelse voorstelling het hulle die angel uit die gevreesde coronavirus gehaal en gesorg dat die Graad 7-groep se eerste dag terug na die lang afwesigheid, onvergeetlik was.

Met alle veiligheidsmaatreëls streng in plek, het Sagie-onnies (vrolik getooi in hul seerower uitrustings) die leerders by die hoofingang van die skool toegejuig, terwyl hulle die skip betree het.

Na saalopening waar sosiale afstand ook toegepas is, het die groep na hul onderskeie klasse beweeg, waar slegs onderwysers van klasse verwissel het.