Heidelberg Soldiers bring vier medaljes huis toe
Die drie jong stoeiers het met vier medaljes terug gekeer huis toe.
Stoeiers van Heidelberg se nuwe stoeiklub, die Heidelberg Soldiers, begin reeds hul merk maak.
Drie plaaslike deelnemers het onlangs aan die Bennie Labuschagne-fondsinsamelingskompetisie deelgeneem in die Noord-Gauteng Stoeisaal, Pretoria Noord. Die fondsinsamelingsprojek is ten bate van Bennie Labuschagne, Olimpiese stoeier en Tuks-hoofafrigter, en is aangebied om fondse in te samel vir die oprigting van ’n stoeiklub in Soshanguve.
Tussen die drie atlete van die Soldiers het hulle vier medaljes teruggebring na Heidelberg. Die stoeiers was Mienke Botha (50 kg), Lindi Oosthuizen o/7 (25 kg), en Tahlia Botha o/7 (25 kg).
Lindi Oosthuizen het ’n goue medalje en brons in die vrystyl-afdeling ontvang.
Mienke Botha het ’n goue medalje in die dogters Presidente-afdeling verwerf.
Tahlia Botha het die silwermedalje ontvang.
“Die kinders werk baie hard, en dit wys met die uitslae,” het Dewald de Wet, afrigter en voormalige Tuks-stoeiafrigter gesê. “Stoei bou karakter, selfvertroue en uithouvermoë wat die kinders sterker maak in die samelewing,” het hy bygevoeg.
Belangstellendes wat meer oor die klub wil weet, kan De Wet kontak by 071 466 3397 of Leona Oosthuizen by 082 399 4202.
Die Heidelberg Soldiers Stoeiklub oefen by Laerskool AG Visser op Dinsdae en Donderdae van 17:00 tot 19:00.
