CAROLINA – ’n Bejaarde egpaar, Martin de Bruin (83) en sy vrou, Marriam (79), se lyke is op 28 September in hul plaashuis buite Carolina gevind.

Volgens kolonel Donald Mdhluli, Mpumalanga polisie woordvoerder, is noodpersoneel omstreek 22:00 na die toneel ontbied, nadat ’n naburige boer die lewelose liggame van die egpaar ontdek het.

Die boer het De Bruin probeer skakel sonder enige sukses, waarna hy agterdogtig geraak het en besluit om ondersoek te gaan instel.

“Volgens die buurman het alles met sy aankoms normaal gelyk, totdat hy deur die slaapkamervenster gekyk het en sy bure in ’n plas bloed op hul rusbank gesien lê het,” het Mdhluli gesê.

Martin het ’n sigbare skietwond aan sy kop gehad met ’n vuurwapen in sy hande, terwyl sy vrou skietwonde aan haar bors en oor gehad het.

Die egpaar is op die toneel dood verklaar.

Carolina polisie ondersoek die omstandighede rondom die egpaar se dood.

Die polisie het ’n beroep gedoen op enige inwoners met inligting wat met die ondersoek kan help, om speurder Thulani Sibeko op 079 989 4150 te kontak.