ERMELO – Verskeie AfriForum-takke in Mpumalanga het verlede maand watertoetse laat doen om vas te stel of daar cholera in die munisipale drinkwater is.

Hoëvelder het onlangs berig oor die Msukaligwa Business and Community Forum (MBCF) se stelling dat cholera in die dorp se water ’n waarskynlikheid is, waarop die Msukaligwa Plaaslike Owerheid gereageer het.

Die woordvoerder, Mandla Zwane, het die plakkate van die MBCF, wat op verskeie platforme gesirkuleer het, gekritiseer en dit as kommerwekkend en opportunisties beskryf.

Daar is watermonsters in Ermelo, Standerton, Bethal, Middelburg en eMahaleni geneem om by ’n geakkrediteerde laboratorium getoets te word.

Die uitslae wat op 28 Junie ontvang is, toon geen tekens van cholera nie en daar is ook nie E.coli in die water teenwoordig nie.

“Ons is dankbaar dat al die drinkwater skoon is, maar die inwoners moet nie te gerus wees nie, munisipaliteite se suiweringsaanlegte is erg onder druk weens beurtkrag en ander uitdagings soos besoedeling in spruite en riviere,” het Hennie Bekker, AfriForum se distrikskoördineerder gesê.

Lees die volledige berig in Hoëvelder.