ERMELO – Die verdagte van die moord op Robert Arthur James (59) en Bangon Roopsai (50), Vincent Madonsela (29), se saak is na 11 Desember uitgestel vir die Direkteur van Openbare Vervolging se beslissing.

Madonsela het op 20 Februarie sy eerste verskyning in die hof gemaak.

Kapt. Carla Prinsloo, die Ermelo-polisiewoordvoerder, het vroeër aan die koerant vertel dat die polisie op 18 Februarie vanjaar ‘n klag van huisroof in Sluiterstraat ontvang het.

Hulle het die twee inwoners dood op die toneel aangetref, asook James se beseerde 25-jarige seun, Eugene, en dié se 20-jarige vriendin.

Madonsela het in Amsterdam se rigting gevlug, in ‘n wit Volkswagen Polo wat aan een van die slagoffers behoort het.

“Hy was ongeveer 10 km buite Ermelo in ‘n ongeluk met ‘n ander voertuig betrokke.”

Die Ermelo SAPD het die verdagte op die ongelukstoneel in verband met die dubbele moord, poging tot moord, huisroof en diefstal van ‘n motorvoertuig in hegtenis geneem.