Klein Sion Chawner, oor wie Hoëvelder voorheen berig het, het ‘n ongelooflike reis beleef sedert sy geboorte op 35 weke.

Op die jong ouderdom van een jaar en vier maande het sy ouers, Angelique en Shane, ontdek dat Sion twee gaatjies in sy hart het.

Hierdie nuus het die egpaar onkant gevang, maar hulle was vasberade om alles in hulle vermoë te doen om hulle seuntjie te help.

Op 4 April vanjaar is Sion onder die sorg van bekwame chirurge geneem om die twee gaatjies in sy hart te herstel, asook ‘n abnormaal groot aar wat nie met geboorte toegegaan het nie.

Op 23 Oktober het Sion sy eerste opvolgkonsultasie gehad, en die dokter het met vreugde aangekondig hoe goed hy aan die herstel is.

Dit is ‘n bemoedigende teken, maar ongelukkig het die mediese rekeninge opgestapel.

Die Chawner-egpaar het ‘n beroep op die gemeenskap gedoen om fondse vir klein Sion se volgehoue sorg in te samel.

Hulle het ‘n BackaBuddy-inisiatief begin om die publiek die geleentheid te bied om ‘n positiewe verskil in Sion se lewe te maak.