Vragmotor verloor vrag op sypaadjie langs Ermelo-skool
Sommige elektriese infrastruktuur en kragdrade is ook in die proses beskadig,
’n Vragmotor het op 22 Januarie sy vrag in Generaal Bothastraat, langs Laerskool JJ van der Merwe verloor toe een van die trok se vragbakkompartemente omgekantel het.
Die vragmotor versper een baan heeltemal en ‘n ander gedeeltelik wat tot verkeersophopings kan aanleiding gee as daar in ag geneem word dat ouers hulle kinders binnekort by die skool sal moet gaan afhaal.
Verkeersbeamptes is op die toneel om verkeer te reguleer.
Sommige elektriese infrastruktuur (kragpaal en kragdrade) is ook in die proses beskadig, en hang vanaf die kragpale langsaan en op die skoolheining by die B-veld.
Dit kan moontlik ‘n veiligheidsrisiko vir voetgangers wat op die sypaadjie loop inhou, en daarom word hulle aangemoedig om ekstra waaksaam te wees in die omgewing.
Theo Craven van die South African Community Crime Watch WhatsApp-groep het motoriste vriendelik versoek om alternatiewe roetes te neem om sodanig ’n bottelnek te vermy.
Hy het vir almal se samewerking gevra, om verskoning vir die ongerief, en sy hoop uitgespreek dat die verkeersafdeling iets kan doen rondom vragmotors wat in die dorp ry.
