Magalies stoomtreinritte blyk ‘n sukses te wees
Besoekers aan Magaliesburg kry die kans om die ekonomie 'n hupstoot te gee – op 'n stoomtrein.
Tjoo! Tjoo!
Met hierdie klanke het Susan die stoomtrein haar terugkeer na Magaliesburg aangekondig toe sy nagenoeg 300 gaste na dié plattelandse dorpie gebring het.
Jare lank was die Magaliesburg Treinstasie stil en vervalle, maar met die ingryping van die inwoners is die Magalies Ontwikkelingsinisiatief gestig om hierdie stasie weer vol voete te kry.
Dit gee ook plaaslike entrepreneurs die kans om hulle produkte op Markdag uit te stal en te verkoop wanneer die stoomtrein – beter bekend as die Magalies Express – sy maandelikse pretrit tussen Parkstasie in Johannesburg en Magaliesburg onderneem.
Sam Savage, een van die organiseerders het gesê hulle het met Reefsteamers ooreengestem om die stoomtrein tussen Parkstasie en Magaliesburg te bedryf.
“Ons probeer mense na ons area lok en terselfdertyd die plaaslike ekonomie aan die gang hou.”
Sy sê hulle plan is om die Markdag so aan te bied dat mense dit so geniet dat hulle net weer sal wil terugkom en nog mense sal saambring.
“Ons bou nou al ses maande lank aan ons Markdagprojek. Ons het ook ‘n huurkontrak met Transnet gesluit om die stasie te bestuur.”
Sam sê die plan is om die stasie weer te kry soos dit 100 jaar gelede gelyk het.
“Daar sal selfs ‘n restaurant ingerig word. Ons wil ook in die week ontwikkelings- en lewensvaardighede aan die inwoners bied sodat hulle selfstandige entrepreneurs kan word.”
Besoekers aan Magaliesburg het die piekniekatmosfeer langs die Blaauwbankrivier en party het ‘n vleisie op die kole gebraai.
Dié wat ‘n aandenking wou koop kon dit by die verskeidenheid stalletjies doen.
Swannie Swanevelder die kinders met sy handgemaakte marionette vermaak en stories vertel terwyl ander ponieritte kon neem.
Die volgende stoomtreinrit sal eers op 24 Januarie volgende jaar wees aangesien die rit vir Desember reeds volbespreek is.
Vir meer inligting kontak vir Sam Savage by 082 620 6369 of per epos by sam@dreamlodge.co.za.
• Reefsteamers, ‘n Artikel 21 nie-winsgewende organisasie, is by die Transnet Erfenisstigting geaffilieer.
