Kennies se kampioene
Laerskool Kenmare se sportsterre blink uit in boks en karate.
Laerskool Kenmare spog met twee leerlinge wat op nasionale en internationale vlak uitblink.
Nicoleen du Plessis het vanjaar haar Suid-Afrikaanse Sportkonfederasie en Olimpiese Komitee (Sascoc) Protea kleure verwerf vir karate en Suid-Afrika twee keer verteenwoordig.
Eerstens het sy Suid-Afrika by die Africa Zone 6 Kampioenskappe verteenwoordig, waar sy in haar ouderdomsgroep gewen het.
Nicoleen het tweedens die land tydens die Commonwealth Karate Kampioenskappe in Indië in September verteenwoordig en as die 2015 Commonwealth Kampioen in haar ouderdomsgroep weggestap.
Sy was een van vyf Suid-Afrikaanse atlete wat goud tydens die kampioenskappe behaal het.
Hierdie karatester was vanjaar onoorwonne in die land, kontinent en by die Commonwealth Kampioenskappe. Sy is ook nommer een in Suid-Afrika vir kumite volgens Karate Suid-Afrika.
Die skool se ander sportster, Brandon Beukes in Graad 7, is in September verkies om Gauteng te verteenwoordig tydens die Suid-Afrikaanse Nasionale Seuns en Dogters Bokskampioenskappe.
Hy het in die 60kg-divisie deelgeneem en is nou die Suid-Afrikaanse bokskampioen in sy divisie.
Laerskool Kenmare is baie trots op hul twee kampioene.
Verwante artikels:
• Prettige atletiekdag by Kenmare gehou
• Kenmare baan die weg met 3D-onderrig
