[OPVOLG] Botsing wat oupa en kleinseun eis was reg van voor
Volgens die News se susterkoerant, die Randfontein Herald, was die oupa en sy kleinseun om 7nm op pad na die plaaslike duiweklub toe die botsing plaasgevind het.
Dit is met groot hartseer dat talle geliefdes en skoolfamilies ‘n kind van ongeveer 10 jaar en sy oupa, wat in sy laat 60’s was, onverwags moes groet toe hulle op Saterdag, 19 Augustus in ‘n motorongeluk dood is.
Volgens die News se susterkoerant, die Randfontein Herald, was die oupa en sy kleinseun om 7nm op pad na die plaaslike duiweklub toe die botsing reg van voor in Lazaarlaan in Wheatlands plaasgevind het.
Volgens ‘n betroubare bron is die man oorlede voordat nooddienste opgedaag het. Die seun het baie ernstige beserings opgedoen en is per ambulans na Lenmed Hospitaal vervoer. Hy sou vandaar na ‘n ander hospital oorgeplaas word, maar is ongelukkig oorlede net voordat ‘n helikopter hom daarheen sou neem.
Lees verder: [NET IN]Ongeluk eis seun wat tevore oorleef het en sy oupa
Die Herald was na die ongeluk op die toneel en het stukke van die motors in die pad sien lê. ‘n Ander motoris het glo aan die Herald vertel dat die oupa en sy kleinseun bekend was in die gemeenskap.
Dié seun was ongeveer twee jaar gelede een van die oorlewendes van ‘n gru-ongeluk wat ses lewens geëis het, insluitend dié van die destydse hoof van die Hoër Tegniese Skool Nic Diederichs, Gunter Bühner. Die seun se ma en vyfjarige suster is ook in die ongeluk dood.
Meer inligting rakende die botsing is nog nie bekend nie.
Het jy dalk meer inligting rakende dié storie? Stuur gerus vir ons ‘n e-pos na krugersdorpnews@caxton.co.za of skakel ons by 011 955 1130.
Vir daaglikse gratis gemeenskapsnuus aan die Wes-Rand, besoek ook ons susterwebtuistes:
Besoek ook ons Facebook, Twitter en Instagram blaaie om jou stem te laat tel!
