Milan Blignaut van Hoërskool Monument het Suid-Afrika se vlag hoog laat wapper toe sy ’n silwer medalje in die vroue-hoogspringafdeling by die Dakar 2026 Jeug Olimpiese Spele in Senegal verower het.

Blignaut het op 10 November tot die eindstryd deurgedring en op die laaste dag van die spele met ’n tweede plek weggestap, volgens Team South Africa se amptelike webwerf.

Haar prestasie het Suid-Afrika se medaljetelling by die spele op 11 te staan gebring.

• Lees die vorige artikel hier: Monnas-atleet gekies vir internasionale Olimpiese byeenkoms

Blignaut het sterk teenstand van ’n atleet van Koeweit gekry. Die twee was die enigste deelnemers wat daarin kon slaag om 1.74m oor te spring. Blignaut kon egter nie die volgende hoogte van 1.76m haal nie en het sodoende die silwer medalje ingepalm.

“Ek is in skok! Ek het nie verwag om ’n medalje te wen nie, veral nie ’n silwer medalje nie. Ek is so bly en dankbaar teenoor almal wat my ondersteun het. Tot op hierdie oomblik is dit die hoogtepunt van my sportloopbaan, en ek hoop om my atletiek, veral hoogspring, so ver moontlik te neem.

“Ek is so bly om hier as ’n medaljewenner van die Jeug Olimpiese Spele te staan. Dit voel onbeskryflik,” het sy op die webwerf gesê.