Lente is uiteindelik hier. Vir die meeste van ons is dit goeie nuus maar vir ander is dit ‘n groot bron van blydskap.

Vir die bejaardes wat nou al maande in hul kamers en eetsale vasgekeer is as gevolg van die Covid-19 inperking is die warmer weer ‘n lang verwagte seën omdat hulle na hartelus weer die dag buite op die vars gesnyde grasperk kan deurbring.

Residentia Moria het op 4 September ‘n Lentedag en -ete vir hul bejaardes aangebied om die nuwe seisoen te vier. Aangesien die tradisionele Lentedag belemmer is deur ‘n onverwagte koue front is die viering met ‘n paar dae uitgestel.

“Gelukkig het ons nie die Lentebraai op Lentedag gehad nie want dan moes almal met jasse en serpe aangesit het!” het Heilie van der Merwe, Moria se maatskaplike werker gesê. “Die Vrydag kon ons heerlik buite in die sonnetjie saamkuier voordat ons vir die feesmaal aangesit het.”

Heilie het vertel hoe dankbaar hulle was dat die grendeltyd oor die algemeen nie so moeilik vir hulle was nie.

“Dit het vanjaar baie goed gegaan, en min inwoners het soos in die verlede verkoue en griep gekry danksy die isolasie. Die inwoners was baie dapper en het moedig gebly, ten spyte van swaarkry omdat hulle weens die isolasie nie hul familie en vriende kon sien nie. Hulle het die personeel ondersteun en gehelp waar hulle kon.”

Neels Rossouw, Moria se eie platejoggie het die groep tydens die Lentedagvieringe met sy musiek vermaak terwyl die Fedics-span wors en hoenders gebraai en saam met ‘n Mojito-vonkeldrankie aan die bejaardes bedien het

Moria vra enige donasies om hul inwoners te help besig bly gedurende die res van die grendeltydperk. “Ons benodig wol, hekelgare, legkaarte, ensovoorts vir die inwoners,” het Heilie laastens gesê.