In plaas daarvan om Kersgeskenke te koop het die span en kliënte van die Mac Merv’s-kroeg eerder hul geld aan ‘n goeie doel spandeer.

Elke jaar samel Anne-Marie en André van der Merwe, die eienaars van dié kroeg, geld en kos in vir die We’re Against Starvation (WAS) Foundation.

Hierdie jaar het hulle weer lekker vermaak vir hul kliënte verskaf en het ses sangers, naamlik Tanya, Natasha, Don McGee, Boeboe, Bella en Jacques die verhoog betree om van Country tot Pop te sing – daar is selfs gejodel.

Die toegang vir hierdie geleentheid wat om 2nm op Sondag, 13 Desember afgeskop het, was ‘n blikkie niebederfbare kos. Daar is ook verskeie mandjies geborg wat lekkernye bevat het.

Elke sanger het aan die einde van die dag ‘n geskenkmandjie gekry om vir hulle dankie te sê, en een van die sangers het haar mandjie vir R500 verkoop sodat sy dit ook aan WAS kon skenk.

Siela Fourie, of ‘Gesig’ soos haar vriende haar ken, was tydens die gelukstrekking die wenner van die eerste mandjie.

Die volgende mandjie is toe opgeveil, en hier was dit Mariki Bartholoma wat daarmee weggestap het toe sy R1 000 op die mandjie gebie het.

Agamis Elisium, ‘n motorfietsklub, het ook ‘n groot klomp geld op die dag geskenk, en selfs ander uitgedaag om hul donasie te ewenaar of te oortref.

Die geld wat ingesamel is tydens die gelukstrekking en veiling, die niebederfbare kos en ander donasies is alles aan WAS geskenk.

Dit was beslis ‘n groot hupstoot vir die organisasie, en almal word hartlik bedank vir hul bydraes.