EPR Sekuriteit se jongste misdaadverslag wys 10 insidente vir die tydperk van 15 tot 17 Januarie.

Hul algemene bestuurder, Johan Krogh, het verduidelik dat drie verdagtes daardie naweek gearresteer is vir misdade wat strek van saakbeskadiging tot gesinsgeweld en huisbraak.

Daar was ook twee gevalle waar voornemende inbrekers die sekuriteitstraaltoerusting afgebreek het.

Op Vrydag, 15 Januarie, is twee gevalle van saakbeskadiging aangemeld. In die eerste geval is ‘n petrolpomp omgery en een van die verdagtes is gevang. In die tweede insident het ‘n Fiat Palio deur ‘n muur in Rant-en-Dal gery.

Op dieselfde dag was daar ook ‘n huisbraak in Noordheuwel waar ‘n TV en rekenaars gesteel is.

Saterdag, 16 Januarie, is vier insidente aangemeld. ‘n Man is gearresteer vir gesinsgeweld en ‘n ander persoon is in Factoria gevang terwyl hy nie betaal het vir koekies nie.

Tydens ‘n huisbraak in Witpoortjie is een mens gevang wat selfone en ‘n tablet gesteel het, en die buitebeskermingstoerusting is by ‘n huis in Rangeview afgesteel.

Op Sondag, 17 Januarie, is daar net twee gevalle aangemeld – ‘n huisbraak in Kenmare, en saakbeskadiging waar die buitebeskermingstoerusting by ‘n huis in Krugersdorp-Noord afgebreek is.