Nories ontwikkel groot motoriese vaardighede
Die skool wou 'n groter fokus op leerders se fisiese ontwikkeling plaas en het toe 'n hindernisbaan op die skoolterrein aangelê wat geskik sal wees vir leerders van Graad 1 tot 7.
Na ‘n paar maande se beplanning en bouwerk is Laerskool Krugersdorp-Noord se nuwe groot motoriese hindernisbaan vir die leerders oopgestel.
Die skool wou ‘n groter fokus op leerders se fisiese ontwikkeling plaas en het toe ‘n hindernisbaan op die skoolterrein aangelê wat geskik sal wees vir leerders van Graad 1 tot 7. Die baan bestaan uit verskillende strukture vir verskillende soorte oefening, soos om oor ‘n raam met houtbalke te klim; jouself op ‘n swaaiende balk te balanseer; sigsag op ‘n balanseerbalk te stap; teen ‘n muur uit te klim; met ‘n tou tot hoog in ‘n boom te klim; aan die monkey bars te hang, deur ‘n staaldrom te kruip; en oor ‘n raam met bande te klouter.
Gerhard Myburgh, Noordskool se Adjunkhoof het verduidelik dat die doel met die baan is om die groot motoriese spiere in die leerders se bene, arms en bolywe te ontwikkel deur hulle te laat hardloop, spring en klim.
Die leerders sal die hindernisbaan weekliks in klasverband gebruik as deel van die Lewensoriënteringskurrikulum.
Dit is veral nou belangrik dat die leerders buite kom en aktief wees nadat hulle so lank in die grendeltyd ingehok was. Hul spiere kan nou op ‘n prettige manier op die hindernisbaan geoefen en ontwikkel word.
