Elkeen van ons onthou daardie onderwyser wat altyd daar was vir ons en wat ‘n onmeetbare groot impak in ons lewens vorentoe gehad het.

Onderwysers is so ‘n integrale deel van grootword dat hul aftreëding ‘n merkbare gaping in ‘n skool kan nalaat, veral daardie onderwysers wat hul lewe lank in die bedryf was.

Tersia Schoeman en Hannelie Niemand is nou al 44 en 45 jaar onderskeidelik in die onderwys. So het die tyd aangebreek vir dié twee legendes onder die Laerskool Krugersdorp-Noord personeel om ‘n laaste maal totsiens te sê.

Tersia was gebore in die Kaap maar het haar pad tot in Roodepoort gevind. Sy het by Laerskool Jozua Naude en Hoërskool Roodepoort skoolgegaan voor sy by die Goudstadse Onderwyskollege gaan studeer het.

In 1978 het Tersia klas begin aanbied by Laerskool Delareyville en oor die jare was sy by Laerskool Wildehondepan, Migdol en Laerskool Wesrand Cons. In 1993 het sy by Noordskool begin en vir Graad 2’s, 3’s, 5’s en 6’e klas gegee.

Hannelie het self ook by die Goudstadse Onderwyskollege studeer en haar lewenslange droom vervul toe sy in 1977 by Noordskool begin het. Daar het sy vir Graad 2’s, 3’s en 4’s klas gegee.