Laerskool Kenmare het reeds vanjaar hul tradisies begin voortsit deur op die eerste dag van die nuwe skooljaar hul jaarlikse klokluiseremonie te hou.

Graad 1-leerders begin hul grootskoolloopbaan deur saam met hul ouers of voogde die skoolterrein deur die skool se hoofhek binne te stap waar skoolhoof Wouter Immelman saam met ander personeel en die Graad 7-leiers elkeen van hulle groet. Daarna lui elke graadeentjie die klok by die hek om hul nuwe begin as laerskoolleerders te simboleer.

Dinsdag, 11 Januarie was die tiende keer dat Graad 1’s die klok gelui het, en oor sewe jaar wanneer hulle klaarmaak met laerskool sal elkeen weer die klok lui voordat hulle ‘n laaste maal deur die hoofhek uitstap.

Kenmare het vanjaar sowat 150 Graad 1-leerders wat in vyf klasse verdeel is, elk met ‘n onderwyser en ‘n studente-onderwyser, wat beteken dat daar een onderriggewer vir elke 15 leerders is.

Die Graad 1’s het dié dag die geleentheid gehad om hul juffroue en nuwe maats beter te leer ken en weg te spring met skoolwerk. Hul eerste atletiekdag by die skool is reeds op Vrydag, 14 Januarie.