Die Graad 1’s van Ambulanté Academy in Noordheuwel het ook onlangs die grootskoolwêreld ingevaar.

Die skooljaar het op Maandag, 10 Januarie vir hul Graad 1’s begin en die hoof Jannie van der Merwe het vertel dat hulle meer as gereed was om al die ander leerders saam met die nuwes te verwelkom.

Hulle het verlede jaar besluit om die skool so ‘n bietjie uit te brei en het sommer vier nuwe klaskamers en ‘n snoepie aangebou. Hulle getalle het gestyg van net 33 leerders tot 80 vanjaar, en het boonop ses nuwe onnies aangestel.

Ons hoop vir die jaar is dat ons tevrede kliënte en spontane, gelukkige kinders sal hê,” het hy vertel.

Hulle beplan om vanjaar kitsgras in hul buite-area te lê en dan ‘n sportveld te ontwikkel. Jannie het gesê dat sport van kardinale belang is en dat die meeste van hulle leerders tans by die Khosa Klub aan sport deelneem.

Die privaatskool is geregistreer by die Departement van Onderwys en volg al die vereiste kurrikulums. Jannie het vertel dat dit God se genade is wat toegelaat het dat hulle so kon groei en dat daar nog groot planne vir die skool is.

Ons visie en missie is net gebed, gebed en gebed.”