Bettie en Hendrik trots op hul goue status
Na hul 50 jaar huweliksherdenking vertel Bettie du Plessis die geheim om gelukkig saam te bly.
’n Goue huweliksherdenking is ’n mylpaal wat Bettie en Hendrik du Plessis met trots bereik het.
Bettie vertel dat sy en haar man op 19 Oktober 1974 getrou het en dat hulle verskriklik geseënd is. Hulle moes lank uitgaan, want toe hulle ontmoet het, was Hendrik 17 en sy 19 jaar oud, waar hulle later in die Paul Krugersaal, in Krugersdorp-Wes, getrou het.
“Ons bly al ons hele lewe lank in Krugersdorp, en wil op geen ander plek woon nie,” het sy bygevoeg.
Ná 50 jaar sê sy dat hulle nog gesond is, behalwe dat Hendrik ‘n diabeet is, en haar voete soms seer is, al hou sy baie van dans.
Sy vertel die geheim om vir 50 jaar getroud te bly is dat jy altyd moet luister wanneer die jonger een praat.
“Maak die lewe vir mekaar mooier, makliker en lekkerder,” het Bettie afgesluit.
